GPP Galicia

Demanda dunha alternativa ao Perte do téxtil que garanta investimentos estratéxicos en Galicia

Demanda que debe facer a xunta de galicia ante o goberno central para garantir investimentos estratéxicos no sector téxtil en Galicia 

 

Os fondos europeos Next Generation configúranse como unha oportunidade histórica para afrontar o futuro do tecido produtivo, máis se cabe, nun escenario marcado pola saída da pandemia, primeiro, e pola invasión rusa de Ucraína e as perspectivas de desaceleración, despois. Estes factores están a xerar unha situación de incerteza que afecta non so á economía no seu conxunto, senón tamén a numerosas empresas españolas e galegas que están a ter dificultades para desenvolver a súa actividade polo encarecemento dos custos, e a algunha das súas industrias máis importantes.

De feito, estes fondos europeos - de executarse con criterios obxectivos e transparentes e en coordinación coa Xunta de Galicia - representan o camiño máis adecuado para lograr impulsar a transformación industrial a partir de tres vectores de crecemento cruciais na próxima década: sustentabilidade, dixitalización e innovación. Galicia está preparada para abrirse paso cara a esta nova economía grazas ás medidas que ten adoptado para apoiar a recuperación económico e grazas tamén a súa aposta pola colaboración de empresas, centros de coñecemento e demais axentes que apostan por crear riqueza e emprego desde a nosa Comunidade.

Estes obxectivos atinxen aos diferentes sectores económicos que configuran o tecido produtivo galego, máis, se cabe, cando nos referimos a aqueles cun maior peso, como é o caso do téxtil. Unha industria na que Galicia é referente no noso país, sendo sinónimo de calidade e de deseño, e situada sempre á vangarda das últimas tendencias no mundo da moda.

O téxtil representa o 37% do PIB de Galicia, facturando preto de 30.000 millóns de euros e dando emprego a 36.000 persoas, cun alto compoñente feminino - o 76% do conxunto e o 8,2% do total de emprego feminino na Comunidade-. Ademais, a moda galega se comercializa en todo o mundo, sendo, así mesmo, a primeira exportadora téxtil a nivel nacional.

Son estas cifras que falan por si soas, e que sitúan tamén a dimensión do reto que a propia industria ten por diante, o da súa relocalización. Neste sentido, hai pouco máis dun ano, e por primeira vez, todo o sector unía as súas forzas para presentar un
proxecto coa intención de que se aprobara un Perte (Proxecto Estratéxico para a
Recuperación e Transformación Económica) específico que servise para impulsar a súa redindustrialización e traer produción de volta a España. Un plan liderado pola
Confederación Moda España e o Consello Intertextil Español (CIE), e no que tamén
participou, de modo activo, Cointega (Clúster do Sector téxtil-moda de Galicia).

Este Perte tiña por obxectivo lograr investimentos por un valor de entre 11.000 e
12.000 millóns de euros, mediante a colaboración público-privada. Pese a importancia destas cifras, e pese a que o proxecto conseguiu unir as vontades tanto das grandes empresas como das pemes, o Goberno central decidiu, sen previo aviso, aparcar este Perte ofrecendo, como único alternativa, a participación desta industria no Perte de Economía Circular, onde introduciu unha pequena partida de 100 millóns en exclusiva para o sector, que aínda non se teñen nin convocado.

A realidade resulta, polo tanto, dramática: dun proxecto que contaba coa participación e a cooperación de todo o sector, e que aspiraba a miles de millóns de euros para afrontar os grandes retos e manter a industria téxtil no lugar que hoxe ocupa, a unha iniciativa subsidiaria, con apenas 100 millóns, que todo o que ofrece son máis palabras bonitas, enmarcadas no concepto da economía circular, que realidades das que poida dispor a nosa industria para afrontar os grandes desafíos que ten por diante.

Unha decisión drástica sobre a que o Goberno central, como vén sendo habitual, non ofreceu ningunha explicación, nunha mostra máis de distribución dos fondos europeos marcada polo centralismo, a lentitude e a falta de transparencia. Este modo de xestión supón un evidente risco de perder investimentos estratéxicos, con capacidade de facer crecer e transformar a economía a corto, medio e longo prazo.

É o caso, por exemplo, da fábrica de fibras téxtiles sostibles de Altri en Palas de Rei. Unha iniciativa tractora do Polo para a Transformación de Galicia, deseñado coa colaboración do Comité de Expertos, que implicará un investimento de 800 millóns de euros e a creación de 2.500 empregos entre directos e indirectos, e sobre a que, sen embargo, o Goberno galego segue agardando unha confirmación do Executivo central sobre o acceso aos fondos europeos tras máis dun ano de ser seleccionada como prioritaria para Galicia e ser a primeira planta en España destas características.

Todo isto sucede cando “a Estratexia da Unión Europea sobre produtos téxtiles sostibles e circulares ten coma obxectivo que para o 2030 todos os produtos téxtiles comercializados na UE sexan de longa duración, que estean fabricados, na medida do posible, con fibras recicladas, e non conteñan substancias perigosas con respecto aos dereitos sociais e o medio ambiente”.

 

Por todo o exposto, as deputadas e deputados do Grupo Parlamentario Popular
presentamos a seguinte proposición non de lei en Pleno.

“O Parlamento de Galicia insta á Xunta de Galicia a demandar ao Goberno central unha alternativa ao Perte do téxtil -aparcado sen explicación e pese á vontade do sector-, capaz de garantir investimentos estratéxicos tanto para a industria de Galicia como para o conxunto da economía galega”