GPP Galicia

Reactivación do sistema de información pública relativo aos datos de prezos do Observatorio de Prezos dos Alimentos

Demanda que debe realizar a Xunta de Galicia ante o Goberno de España para que se reactive o sistema de información pública relativo aos datos de prezos do Observatorio de Prezos dos Alimentos, adscrito ao Ministerio de Agricultura, Pesca e Alimentación

 

A equiparación das rendas da agricultura, a gandería e a pesca coas dos demais sectores de actividade económica é un mandato constitucional e un principio inspirador do marco normativo da Unión Europea.

Entre os compoñentes básicos, que contribúen á estabilidade das rendas neste sector primario, están os prezos en orixe dos produtos agrarios e pesqueiros, polo que é desexable que non se produzan fortes oscilacións que distorsionen a relación oferta- demanda, o cal prexudica seriamente tanto a produtores como a consumidores. É necesario, por tanto, avanzar no coñecemento das circunstancias explicativas da evolución da formación dos prezos dos alimentos en orixe e destino.

Os prezos en orixe e destino dos alimentos configuran, en gran medida, as rendas dos agricultores, gandeiros e pescadores; a capacidade adquisitiva dos consumidores, e a normalización de moitos indicadores da economía nacional.

Por tanto, a estabilidade, dentro de límites razoables, destes prezos é un obxectivo desexable, a cuxo logro pretende contribuír a creación do Observatorio de Prezos dos Alimentos.

Así, o BOE do 25 de abril de 2000 publicaba o Real Decreto 509/2000, de 14 de abril, polo que se crea o Observatorio de Precios de los Alimentos, como órgano colexiado, adscrito ao Ministerio de Agricultura, Pesca e Alimentación, con funcións de consulta, asesoramento, información e estudo en materia de prezos dos alimentos.
Na composición do Observatorio, están presentes representantes da Administración
Xeral do Estado, das Administracións Autonómicas, da Administración Local, e da
«Empresa  Nacional  Mercados  Centrais  de  Abastecemento, Sociedade  Anónima»

(MERCASA), así como dos produtores, distribuidores e consumidores dos alimentos, a través das organizacións oficialmente recoñecidas.

No  artigo  3  do  Real  Decreto  509/2000  aparece  a  composición  do  Pleno  do Observatorio de Precios de los Alimentos, que no seu apartado f o sector do mar aparece representado no Pleno o Observatorio por dous vocais do sector pesqueiro.

Así  esta  representación  a  conforman  a  Federación  Nacional  de  Cofradías  de
Pescadores e a Federación Española de Organizaciones Pesqueras (FEOPE)

A día de hoxe, a inflación está a sangrar os petos da ciudadanía e para iso está a utilizar o gasto que fai aos fogares máis vulnerables: a alimentación. No mes de xullo, a inflación anual en España situouse no 10,8%, segundo sinala o indicador adiantado do Instituto Nacional de Estatística (INE).

Ademáis, o consumo de peixe rexistra unha forte freada ante a alza de prezos. Os fogares reduciron as súas compras nos últimos doce meses un 15,3%, tanto en frescos como en conxelados.

Segundo os datos máis recentes do Ministerio de Agricultura, Pesca e Alimentación, o linguado encabeza as caídas cunha baixada do 58,4% das compras e o rodaballo desplómase un 41,4%. A robaliza, o atún e o bonito un 19,6% e o rape un 17%.

A sardiña e anchoa retroceden un 13,8%, a cabala un 13% e a pescada un 11,9%. A dourada un 8,4% menos de compras, mentres que o bacallau é o único que logra resistir, cunha baixada do 0,1%.


Por todo o anterior o Grupo Parlamentario Popular presenta a seguinte proposición non de lei :
“O Parlamento de Galicia insta á Xunta de Galicia a demandar ao Goberno de España a que reactive o sistema de información pública relativo aos datos de prezos do Observatorio de Precios de los Alimentos adscrito ao Ministerio de Agricultura, Pesca e Alimentación”.