Utilizamos cookies para asegurar que damos a mellor experiencia a o usuario no noso sitio web. Si continúa utilizando este sitio asumiremos que está de acordo. Mais información Política de Cookies

Pontevedra, 13 de marzo de 2016.- O presidente do PPdeG, Alberto Núñez Feijóo, asegurou hoxe que a renovación efectuada no partido tras os últimos congresos provinciais sitúa a esta formación en mellores condicións que en 2009 para obter unha vitoria electoral.

Así se pronunciou durante a clausura do Congreso do PP de Pontevedra, no que Alfonso Rueda foi elixido novo presidente provincial e que culmina a renovación do partido en todas as provincias galegas. Feijóo equiparou a situación actual coa que había en 2009, na que “se reparten sillóns sen ter nin acordo nin votos”. 

“Recordo como en 2009 PSOE e nacionalistas xa se estaban a repartir os cargos sen que se produciran aínda as eleccións”, asegurou, e subliñou que non se deron conta de que esas eleccións as tiñan perdidas porque o PP comezou a gañalas previamente, cando decidiu renovarse e unir as súas forzas no Congreso de renovación de Manuel Fraga, en 2006. 

Como daquela, o presidente dos populares galegos asegurou que ao longo destas semanas viu un partido vivo e activo, e que por máis que outros tapen os oídos e non queiran ver, o PP ten a voz dos 7,3 millóns de españois que o votaron. 

Precisamente con motivo desta nova etapa que o PPdeG comeza con ilusión, o presidente dos populares galegos reivindicou unha política para as persoas e con persoas con vocación de servizo, fronte a aqueles que cren que “é máis importante un tuit enxeñoso que un orzamento rigoroso”.  

Nesta liña, defendeu a política na que a experiencia é un valor, así como unha política responsable e que se poida tomar en serio, na que gañar non é o mesmo que perder porque importa o que opina a xente, na que se exerce con humildade. “E reivindico que quen mellor representa esa política é Mariano Rajoy”, concluíu. 

QUEN MELLOR REPRESENTA A PONTEVEDRA
Feijóo trasladou o seu apoio ao presidente do PP porque, segundo enfatizou, é o único candidato que actuou con responsabilidade desde as eleccións xerais. Ademais dixo que Rajoy é quen mellor podería representar a marca de Pontevedra no mundo.

No comportamento contrario, situou ás forzas políticas que teñen o país parado porque non asumen o resultado das urnas e considerou que isto “o único que ten de nova política é que nunca antes se dera tal nivel de irresponsabilidade”. 

“Pasamos do fracaso sen precedentes de Pedro Sánchez nas urnas ao fracase sen precedentes de Pedro Sánchez na investidura”, manifestou, e lamentou que parece que o terceiro fracaso que quere o candidato socialista sexa o de España. “Parece que queren que o seu fracaso sexa o de todo o país para ver se así sacan proveito”, resumiu, e solicitou que non se enroquen e permitan a España seguir adiante. 

Sobre o pacto entre PSOE e Ciudadanos, considerou que non é un pacto de investidura nin de goberno, senón de non agresión, de bloqueo e de interese electoralista. “Demostran que o país é o de menos, e prepáranse para as urnas”, dixo, e a continuación preguntouse para que, se estes partidos demostraron que o resultado das urnas lles dá igual. “Do PSOE poderíamos esperalo, pero desde logo que Ciudadanos decepciona”, trasladou.

RUEDA E LOUZÁN
Feijóo tamén felicitou ao PP de Pontevedra por ter escollido a Alfonso Rueda como novo presidente da formación. Despois de recordar que tanto a vitoria electoral de 2009 como moitas outras non serían posibles sen as súas achegas, considerou que o novo papel de Rueda é un acerto, como o foron todas as responsabilidades anteriores que el lle encomendou, tanto como secretario xeral do PPdeG como conselleiro e vicepresidente da Xunta de Galicia. 

“Cumpriu coas expectativas e coas súas funcións”, dixo e, tras recordar que Rueda foi o secretario xeral que máis tempo estivo no seu cargo na nosa historia, asegurou que o PPdeG tamén tivo nel a un “bo tipo”. 

Igualmente, tamén recoñeceu o papel de Rafael Louzán á fronte do PP pontevedrés ao longo dos últimos anos. Así, recordou que o azul do PPdeG estivo sempre nos mapas de Pontevedra en todas as eleccións, en ocasións de xeito abrumador, e apuntou que tantas vitorias electorais se acadan con dedicación e esforzo. Por iso, agradeceulle a Louzán o seu traballo e a súa disposición permanente. “Foi quen me abriu a porta dunhas listas electorais; sei onde estou e grazas a quen estou”, engadiu.


A Coruña, 12 de marzo de 2016.- O presidente do PPdeG, Alberto Núñez Feijóo, pediu ao seu partido dar o máximo polos galegos ante aqueles que, incapaces de chegar a un acordo no país, din que non habería problemas para xuntarse en Galicia. "Polo tanto quere para nós o que non lles vale para España", di. Así, preguntabase por que queren para aquí o que non aceptan para o resto do Estado.

Deste xeito se expresaba o líder popular na clausura do XV Congreso Provincial do PP de A Coruña, onde acompañou ao novo presidente da provincia, Diego Calvo, do que salientou o traballo e esforzo que realizou durante a súa candidatura, así como a súa xuventude e experiencia. 

O presidente tamén recordou ao seu antecesor no cargo, a Carlos Negreira, do que puxo en valor o seu carácter gañador “que soubo contaxiar a toda a militancia”, a súa cercanía e a súa capacidade de traballo. Por último, apuntou que "o PP da Coruña pode poñerse retos difíciles porque está acostumado a acadalos", lembra.

FUTURO DESPEXADO FRONTE INOPERANCIA
Na súa intervención, o máximo mandatario do PPdeG subliñou que hoxe Galicia volve crecer, posúe unhas contas públicas rigorosas e útiles, crea emprego, innova e exporta máis que nunca, e ten menos impostos, chegando incluso a non pagar polo de Sucesións. 

Aínda que tamén asumiu que queda camiño por diante, Feijóo apuntou que a nosa comunidade está superando as dificultades e ten hoxe moito máis futuro.

Nese sentido, manifestaba que, cando xa por fin estamos saíndo da irresponsabilidade socialista, hai que seguir avanzando e non caer no disparate chavista que propón Podemos. Para o presidente, fomos coñecendo a súa admiración por ideoloxías pasadas e rexímenes fracasados.

O dirixente popular dixo que, se ben Podemos fai cousas moi ben como buscar o protagonismo, protestar ou presumir, “gobernar gobernan moi mal”. Como mostra disto, Feijóo lembrou que non son quen nin de tapar os baches que son cada vez máis difíciles de sortear nas cidades galegas onde gobernan. Ademais, apuntou que neses baches poderá caer o PSOE e mesmo enterrar nelas o seu futuro, pero Galicia non. 

Feijóo incidiu en que, pese a ser o partido máis votado, os populares non se conforman e deben dar sempre máis, engadindo que iniciaron unha renovación de actitudes, de ideas e de equipos que ten ás persoas no centro, sendo esta a senda pola que continuarán.

“Nada do que conseguimos estes anos foi sinxelo pero fomos quen de acadalo”, dicía Feijóo ao tempo que aseveraba que, do mesmo xeito, conseguirán o que aínda teñen por diante. “Este partido precisa de cada un dos seus afiliados e Galicia precisa deste partido”, sentenciou. 

Santiago, 10 de marzo de 2016.- O presidente do PPdeG, Alberto Núñez Feijóo, avanzou hoxe a elaboración dun Plan Estratéxico de Dinamización dos Pequenos Cascos Históricos para favorecer a conservación nestes núcleos e promover a fixación de poboación neles.

Como sinalou, na nosa comunidade hai, actualmente, 31 conxuntos históricos declarados Ben de Interese Cultural, dos cales 18 contan cun plan especial de protección, 6 non contan con este documento e outros 7 son conxuntos declarados BIC que non se corresponden con centros urbanos ou cascos vellos de cidades ou vilas.

Favorecer a conservación e fixar a poboación nos cascos históricos
Feijóo explicou que para lograr o primeiro obxectivo, o de favorecer a conservación dos cascos históricos, a redacción do plan partirá dun estudo pormenorizado e completo da situación dos centros e barrios históricos, que será elaborado por un equipo universitario multidisciplinar. Sobre esa base, como engadiu o mandatario, proporase unha estratexia xeral para a promoción, o uso e a conservación destes conxuntos históricos, sempre dende o concepto de sustentabilidade e plena protección do patrimonio.

En canto ao segundo gran obxectivo, o de fixar poboación, está previsto que o plan estableza diferentes liñas de actuación, tales como axudas de apoio á rehabilitación das vivendas; a mellora dos documentos de ordenación e planificación urbana; a mellora dos servizos de comunicación e subministros de enerxía; e tamén medidas de promoción da actividade económica.

En definitiva, segundo sinalou o líder dos populares galegos, trátase de crear unha rede de conxuntos históricos de vilas e pequenas cidades e de elaborar un plan que promova un modelo urbano sustentable nesas vilas.
Santiago, 10 de marzo de 2016.- O líder do PPdeG, Alberto Núñez Feijóo, avanzou hoxe que o Consello aprobou o Plan de sendas de Galicia, que concreta a construción de 170 quilómetros de itinerarios seguros e integrados, desde o punto de vista dos materiais a utilizar, na paisaxe.

Como sinalou o mandatario, estas vanse construír na marxe das estradas de titularidade autonómica. Para decidir a prioridade de cada actuación, a Xunta seguirá criterios de poboación, tráfico, sinistralidade, orografía e clima.

Deste xeito, Feijóo engadiu que, nunha primeira fase, executaranse 55 sendas que discorren por máis de 75 quilómetros en sete comarcas: Bergantiños, Santiago, Salnés, A Coruña, Ferrol, A Terra Cha e Vigo.

Ademais, o Goberno galego xa está a traballar nunha segunda fase, que se estenderá ás comarcas de Lugo, Ourense, Pontevedra e O Morrazo.

Segundo explicou o presidente, en cada unha destas comarcas identificáronse aqueles treitos da Rede Autonómica de Estradas que teñen un maior potencial para que os peóns e ciclistas se despracen por eles de xeito cotián.

Do mesmo xeito, Feijóo subliñou que as sendas estarán deseñadas de xeito que perduren, se integren na paisaxe e sexan seguras. Así, contarán co pavimento integrado, bordo con sinalización, separador verde e a gabia de seguridade.

Por outra banda, destacou que se contemplan catro tipos de sendas: a completa, onde se dispón de maior espazo e a zona de peóns e o carril para bicicletas será segregado; a mixta, compartida para peóns e ciclistas; a mixta con bordo, na que a gabia de seguridade se substitúe por bordo e canalización de pluviais; e a senda mínima, onde se manteñen como elementos de identidade o pavimento integrado e o bordo con sinalización.

Logo de asegurar que a Xunta vai investir na construción destas 55 sendas da primeira fase do Plan 26,3 millóns de euros, Feijóo destacou que se trata dunha iniciativa que se enmarca no Plan de Seguridade Viaria 2016-2020 aprobado o pasado mes de febreiro e que se aliña no Plan Estratéxico 2015-2020 de Galicia no eido da promoción dunha economía baixa en carbono e fomento da mobilidade sustentable.

Segundo subliñou, o Plan de sendas é outra medida para facer de Galicia un mellor lugar para vivir, e para mellorar a calidade de vida dos galegos e que, neste caso, tamén reforza o compromiso do Goberno galego coa mobilidade sustentable.
Santiago, 10 de marzo de 2016.- O presidente do PPdeG, Alberto Núñez Feijóo, destacou hoxe que o Plan de aforro en alugueiros para 2016 e 2017 permitirá o aproveitamento ao máximo do patrimonio da Xunta e un aforro anual de máis de 5,5 millóns de euros.

Logo de precisar que esta iniciativa vén a dar continuidade ao traballo feito neste ámbito no período 2009-2015, co obxectivo prioritario da redución no gasto en alugueiros, Feijóo afirmou que se trata dun plan ambicioso, xa que se o gasto en alugueiros baixou case un 30% nos últimos anos, agora a Administración autonómica aspira a reducir esta partida orzamentaria noutro 76%, camiñando cara a unha política de alugueiros cero.

“Estamos a falar de acadar un aforro anual de máis de 5,5 millóns de euros, que se utilizarán na mellora de espazos que xa son propiedade da Xunta”, dixo, ao que engadiu que este plan incide na concentración de espazos administrativos, na unificación da imaxe corporativa dos espazos pertencentes a Administración, e na implantación dunha xestión integral e unificada do patrimonio da Xunta.

“Trátase, en definitiva de aproveitar ao máximo o que temos, de sacarlle o máximo rendemento ao patrimonio inmobiliario da Xunta e de seguir a traballar por unha Administración máis útil para os cidadáns”, afirmou, incidindo en que o obxectivo é ir cara a unha política de alugueiro cero e investir o aforrado en edificios propiedade da Xunta. “Polo tanto máis aforro, máis espazo e maior investimento que xera, sen dúbida, emprego”, abundou.

Feijóo afirmou que o plan actuará nas cidades onde hai unha maior concentración de servizos públicos. “Concretamente imos presentar proxectos para Pontevedra, A Coruña, Lugo, Ourense e Santiago, e en Ferrol tamén estamos estudando algúns espazos que a medio prazo poden quedar baleiros”, precisou.

O mandatario lembrou que o antecedente máis próximo desta decisión, e que abriu esta nova política patrimonial, foi a de ubicar a Cidade da Xustiza no edificio do antigo Hospital Xeral.

Santiago de Compostela, 9 de marzo de 2016.- O voceiro do PPdeG, Miguel Tellado, salientou que a día de hoxe hai case a metade de altos cargos dos que había cando gobernaba o bipartito, e que, ademais, o aforro derivado da ampla redución de liberados sindicais e asesores feita polo Goberno galego supón un 40 por cento de aforro á autonomía.

E é que con motivo da apertura esta semana do ‘Portal de Transparencia e Goberno Aberto’ –que coincidía coa entrada en vigor da Lei de Transparencia- fíxose público numeroso contido inédito, que é a primeira vez que se fai de acceso público na historia da comunidade ademais de facilitarase un acceso sinxelo e directo a contido que antes se publicaba pero estaba disperso.

Nese sentido, Tellado sinalou que é preciso recordar que a Xunta conta con 103 altos cargos, aos que se suman os xefes de gabinete e de prensa, ata facer un total de 123, sendo este número practicamente un 40 por cento menos do que había co Goberno bipartito, cando se superaban os 200 cargos.

Así mesmo, matizou que os contratos de alta dirección non son altos cargos, senón persoal que  en ocasións nin sequera forma parte da Xunta, como traballadores da CRTVG ou a presidenta do Consello Económico e Social e que, aínda así, a Xunta os inclúe no seu Portal. Deste xeito, tamén aproveitou para destacar que por primeira vez se leva a cabo un exercicio de transparencia e se coñecen estes contratos e o seu custe pois, antes había moitos máis e nin tan sequera os podíamos coñecer.

O portavoz tamén salientou que os asesores supoñen hoxe a metade do gasto dos liberados sindicais polo que invita a evitar a demagoxia á hora de abordar este tipo de cuestións. Segundo o voceiro, mostra desa redución levada a cabo polo Goberno da Xunta é que, na actualidade, o custe do persoal de libre designación é de 4,73 millóns de euros mentres o dos liberados ascende aos 10,7 millóns.

E é que no tocante ao persoal eventual, nos que se inclúen os que popularmente se coñecen como asesores, compróbase unha redución do 35 por cento no seu custe.  Así mesmo, Tellado recorda que a partida para este persoal en 2008 elevábase ata os 7,62 millóns.

No caso dos liberados sindicais -con 832 traballadores recoñecidos a día de hoxe- Tellado lembrou que, se ben no 2011 se levou a cabo unha redución de 120 representantes que supuxeron un aforro de catro millóns de euros, dous anos máis tarde sumóuselle outro recorte de 200 liberados máis. Nesa ocasión, o aforro foi de cinco millóns de euros. En total, neste capítulo na administración xeral houbo unha redución do 40 por cento nos últimos sete anos.

Deste xeito, o portavoz non só pon de manifesto o aforro acometido nestes eidos desde a entrada do PPdeG na Xunta senón que celebra que este tipo de medidas permitan aos cidadáns contar cun Goberno máis aberto, accesible e controlado por todos os galegos e galegas.









Santiago de Compostela, 8 de marzo de 2016.- O portavoz dos populares de Galicia, Miguel Tellado, puxo en valor que o Goberno galego reforce a súa aposta pola transparencia.

Así se expresou o voceiro trala apertura do Portal de Transparencia e Goberno aberto que, coincidindo coa entrada en vigor da Lei de Transparencia e Bo Goberno, abriu a Xunta co obxectivo de que os cidadáns teñan unha lei plenamente efectiva e unha Administración á que poder acceder facilmente.

Tellado celebrou que a nosa comunidade conte agora cun Goberno aínda máis aberto, máis accesible e que está máis controlado por aqueles para os que está ao servizo: todos os galegos.

E é que, grazas a esta iniciativa facilitarase un acceso sinxelo e directo a contido que antes tamén se publicaba pero que estaba disperso, como pode ser a normativa en tramitación, os efectivos de persoal público e as retribucións ou os perfís e declaracións de actividades dos altos cargos. 

Así mesmo, o Portal incorpora numerosa información inédita, da que é a primeira vez que se fai de acceso público na historia da autonomía. É o caso da relación dos bens inmobles propiedade da Xunta, a conta xeral da Comunidade, a información das viaxes dos altos cargos ou a información relativa aos liberados sindicais na Administración autonómica.  

O portavoz quixo salientar que esta medida é unha mostra máis do compromiso da Xunta por achegarse á cidadanía e por facilitar, mediante este tipo de iniciativas, que a xente tamén se acerque máis ao Goberno cunha maior información e control sobre el. 

Cómpre lembrar que, ademais, a Plataforma de Contratos publicará diariamente aqueles considerados menores que se asinen no día anterior. 

Xa nos vindeiros días, cando comecen a asinarse convenios que estean baixo a vixencia desta lei, incorporaranse ao Portal facilitando por primeira vez o acceso ao texto completo do convenio. 


O GRUPO POPULAR DEFENDERÁ NO PLENO A PRESENTACIÓN DOS DATOS DO REXISTRO GALEGO DE INFARTO DE MIOCARDIO E QUE O CONCELLO DE MADRID MANTEÑA A RÚA ÁLVARO CUNQUEIRO



·    A orde do día incorpora tres proposicións de Lei: unha sobre responsabilidade civil ambiental e Ministerio Fiscal; outra para a transferencia da AP-9 a Galicia; e a última para a reforma da Lei de servizos sociais



Santiago, 8 de marzo de 2016.- O Grupo Popular defenderá no Pleno da vindeira semana dúas proposicións non de lei a través das que se insta á Xunta a presentar os datos correspondentes ao rexistro galego de infarto agudo de miocardio e para que o Concello de Madrid manteña no rueiro municipal a rúa Álvaro Cunqueiro, xa que a acusación de “escritor franquista” carece de rigor e tal acusación falsifica e deosta a súa biografía persoal e traxectoria intelectual. A sesión plenaria incorpora a comparecencia da conselleira do Medio Rural para dar conta do plan de fortalecemento do sector lácteo.



Pedro Puy informou que o Pleno dará comezo co debate de tres proposicións de lei. A primeira, de toma en consideración dunha iniciativa lexislativa sobre responsabilidade civil ambiental e Ministerio Fiscal, á que seguirá o debate de aprobación da proposición de lei para a transferencia da titularidade e competencia da AP-9 a Galicia e o debate de toma en consideración da proposición de lei do Grupo Popular de reforma da Lei de servizos sociais, que pretende reforzar e blindar o papel das entidades de iniciativa social na prestación de servizos.



A sesión plenaria continuará coa comparecencia da conselleira do Medio Rural para informar do Plan de fortalecemento do sector lácteo. Puy explicou que nesta intervención darase conta do labor que está levando a cabo a consellería a través do Plan de Fortalecemento do sector lácteo, no que están presentes representantes da administración, a industria, a distribución, cooperativas, organizacións profesionais agrarias, o Ligal, o Centro galego de control leiteiro, as universidades e a comunidade científica.



Este grupo de traballo xa acordou o pasado 2 de marzo unha batería de propostas urxentes que o Goberno central trasladará ao Consello de Ministros de Agricultura da Unión Europea para garantir a estabilidade do sector de xeito inmediato.



INFARTO DE MIOCARDIO E RÚA ÁLVARO CUNQUEIRO



A orde do día da sesión plenaria incorpora dúas proposicións non de lei do Grupo Popular. A primeira delas, insta á Xunta de Galicia a presentar no Parlamento os datos correspondentes ao rexistro galego de infarto de miocardio, co obxectivo de adoptar as decisións oportunas para a atención destes enfermos.



Pedro Puy lembrou que o Pleno do Parlamento aprobou o 3 de decembro de 2014 unha iniciativa do Grupo Popular a través da que se demandaba á Xunta a creación dun rexistro único galego que recollera toda a información sobre morbi-mortalidade en relación co infarto agudo de miocardio, de xeito que con eses datos se adaptaran os recursos humanos e materiais ás necesidades asistenciais das distintas estruturas de xestión sanitaria.



“Desde aquela data, o Servizo Galego de Saúde deu unha serie de pasos para a creación deste rexistro, cos indicadores de calidade, datos epidemiolóxicos e asistenciais precisos para  unha planificación eficaz, eficiente e equitativa dos recursos destinados ao tratamento do infarto agudo”, dixo Pedro Puy.



A segunda proposición non de lei que defenderá o Grupo Popular ten que ver co coñecemento público da incorporación por parte do Concello de Madrid do escritor e xornalista Álvaro Cunqueiro nunha relación de persoas relacionadas co franquismo que poderían perder a honra de poñer o seu nome a unha rúa madrileña. Neste sentido, Puy salientou que “a cultura e a sociedade galega entenden que Álvaro Cunqueiro, ademais de ser un dos principais persoeiros da nosa cultura no século XX, fíxoo nunha etapa na que non era doado manter vivo o facho da nosa cultura”, polo que “todos os deputados do Grupo Popular asinamos unha proposición non de lei na que demandamos que se poña en coñecemento do Concello de Madrid a importancia que ten para a cultura galega Álvaro Cunqueiro e, polo tanto, non se lle retire esa rúa coa que se lle lembra”.



FUSIÓN DE CONCELLOS E TARXETA BENVIDA



Na sesión plenaria, o Grupo Popular tamén cuestionará ao Goberno galego sobre o proceso de fusión iniciado polos concellos de Cotobade e Cerdedo, así como pola posta en marcha da Tarxeta Benvida, que achegará 100 euros ao mes para os nenos que nazan en Galicia a partir do 1 de xaneiro de 2016.



A modo de resumo, Pedro Puy indicou que a sesión plenaria inclúe 29 iniciativas, “das que o Goberno galego  propuxo unha e o Grupo Popular outras cinco, polo que as restantes 23 cuestións son a iniciativa dos grupos da oposición”.  “Confírmase, unha vez máis, que a oposición nesta Cámara pode facer a súa labor, dado que calquera grupo que estea na oposición noutro Parlamento asinaría un reparto de materias na orde do día dun pleno semellante a esta”, sinalou.



CRISTINA ROMERO AVANZA O DEBATE NO PLENO DA VINDEIRA SEMANA DAS PROPOSICIÓNS DE LEI PARA O TRASPASO DA AP-9 Á XUNTA E DE MODIFICACIÓN DA LEI DE SERVIZOS SOCIAIS



·    “Esperamos que ambas iniciativas lexislativas saian co maior respaldo posible dos deputados deste Parlamento, para o que o Grupo Popular manterá a súa plena disposición ao diálogo”, indicou



Santiago, 7 de marzo de 2016.- A viceportavoz do Grupo Popular, Cristina Romero, avanzou hoxe que o Pleno da vindeira semana debaterá a aprobación da proposición de lei que solicita a transferencia da AP-9 á Xunta de Galicia e a toma en consideración do proxecto de lei de modificación da Lei de servizos sociais, coa que se pretende reforzar e blindar o papel das entidades na prestación de servizos sociais. Respecto dos posibles candidatos ás eleccións galegas, Romero contrastou a unidade do PP respecto a que Feijóo é o mellor candidato fronte ás discrepancias existentes no PSOE coa candidatura de Besteiro.



“Trátase de dúas proposicións de lei significativas, tanto para o desenvolvemento económico e a mellora das comunicacións viarias en Galicia, como para a optimización dos nosos servizos sociais, polo que esperamos que ambas iniciativas lexislativas saian co maior respaldo posible dos deputados deste Parlamento, para o que o Grupo Popular manterá a súa plena disposición ao diálogo”, sinalou Romero.



Respecto da proposición de Lei de solicitude de transferencia da AP-9 á Xunta de Galicia, a viceportavoz popular avogou por “manter no Pleno a unanimidade acadada en Comisión para que esta demanda chegue ao Congreso dos Deputados co maior respaldo e firmeza do Parlamento galego”. “Desde o Grupo Popular reiteramos o interese por xestionar esta autoestrada que vertebra e comunica o norte e o sur de Galicia e que ten contribuído e contribúe notablemente ao desenvolvemento da Comunidade galega”, engadiu.



Cristina Romero lembrou “a boa disposición amosada esta fin de semana pola ministra de Fomento en funcións, Ana Pastor, para falar sobre a transferencia desta autoestrada”, aínda que insistiu na “necesidade de que a concesionaria preste o servizo nas mellores condicións e dispoña dunha política de peaxes cos beneficios que se prestan noutras autovías españolas”.

REFORZAR E BLINDAR ENTIDADES SOCIAIS

En segundo lugar, Romero avanzou que a sesión plenaria procederá ao debate para a toma en consideración da proposición de lei do Grupo Popular a través da que se solicita a modificación da Lei de servizos sociais, co obxectivo de reforzar e blindar o papel das entidades de iniciativa social na prestación de servizos, dotándoas dun novo mecanismo que impulse as súas relacións coas administracións públicas e ofrecendo unha maior seguridade xurídica ás actividades económicas deste sector.



Neste sentido, a viceportavoz subliñou que esta iniciativa lexislativa “nace logo dun intenso traballo e das achegas realizadas polo Comité Español de representantes de persoas con discapacidade (CERMI)” e apuntou que desde o Grupo Popular “imos buscar ao longo da tramitación parlamentaria o apoio dos demais grupos, para o que estaremos abertos a estudar e consensuar as súas propostas co obxectivo de que esta modificación lexislativa saia co maior respaldo posible”.

Cristina Romero explicou que con esta modificación lexislativa “Galicia adapta a súa normativa á directiva europea 2014/24/UE, dando entrada aos concertos sociais como modalidade diferenciada do concerto xeral, ao tempo que se crea a figura dos acordos marco para a xestión de servizos sociais coas entidades para atender, na medida que sexa posible, a libre elección da persoa destinataria do servizo”.



“A posta en marcha destes concertos sociais suporá un recoñecemento á necesidade de establecer condicións especiais a estas prestacións dadas as especificidades dos servizos sociais”, indicou.



Esta modificación da Lei de servizos sociais tamén recolle que as administracións públicas darán prioridade ás entidades sen ánimo de lucro cando existan análogas condicións de eficiencia, calidade e rendibilidade social, ao tempo que se establecerán fórmulas para garantir o mantemento na prestación dos servizos sociais por parte das entidades que xa os viñan realizando.



BLUF DE PRIMARIAS SOCIALISTAS



Cuestionado sobre os posibles candidatos ás eleccións galegas, Cristina Romero indicou que no Partido Popular “somos respectuosos cos procedementos internos dos outros partidos” e salientou que no PP “fixemos un calendario para a renovación dos equipos, ideas e persoas que estamos a cumprir”. Neste sentido, apuntou que os socialistas galegos “fan un calendario pero logo non o cumpren, polo que o das primarias parece un bluf máis dos que xa nos teñen acostumados”



A viceportavoz popular recoñeceu que non hai candidato designado nin polo PP nin polo PSOE. Porén, manifestou que “existe unha gran diferenza: todo o Partido Popular coincide en que Feijóo é o mellor candidato, cousa que non está a ocorrer no Partido Socialista, visto o acontecido esta fin de semana”.

O presidente do PPdeG participa no congreso provincial do PP de Lugo, onde Elena Candia saíu elixida presidenta da formación na provincia

Feijóo sinala que a renovación do PPdeG amplía a vantaxe cos que están moi lonxe de ser o que precisa Galicia 

Considera que os populares deben esixirse máis e non deben permitirse a irresponsabilidade do PSOE, nin a incoherencia de Ciudadanos ou a demagoxia de Podemos

Subliña que o PP é o partido que representa aos galegos: cómo son, cómo senten, cómo fan. É o partido do rural galego, o partido das mulleres e homes do mar e o partido do sentir maioritario das galegas e os galegos

Lugo, 6 de marzo de 2016.- O presidente dos populares galegos, Alberto Núñez Feijóo, sinalou hoxe que a renovación do PPdeG achega o partido aos galegos e á Galicia de mañá, ao tempo que amplía a vantaxe cos que están moi lonxe de ser o que precisa Galicia.

Segundo o dirixente popular, o PPdeG é o partido con máis experiencia e con máis experiencias, pero nunca deixa de aprender do que fixo, dos retos que tivo que abordar, dos erros e, sobre todo, dos galegos. Baixo o seu punto de vista, Galicia ensinoulle ao partido esforzo, constancia, perseverancia e, por tanto, a formación seguirá aprendendo da Comunidade.

Así se expresaba o líder dos populares galegos na clausura do congreso provincial do PP de Lugo, onde aproveitou para felicitar á nova presidenta, Elena Candia, a quen lle lembrou que debe representar a toda a militancia da provincia e defender os intereses de toda a poboación.

Do mesmo xeito, agradeceu ao presidente saínte, Xosé Manuel Barreiro, o seu traballo e dedicación á fronte da formación provincial nos últimos anos e tamén na vicepresidencia do partido autonómico.

UN PARTIDO ACTIVO QUE SE RENOVA
O presidente do PPdeG criticou a volatilidade e a fraxilidade dos principios do resto de partidos e fixo fincapé en que a formación dos populares ten que ofrecer algo máis, manténdose por riba das frivolidades e achegando solidez.

Con respecto a isto, sinalou que o PPdeG é o primeiro partido da provincia, de Galicia e de España porque os cidadáns así o decidiron. Por iso, cre que os populares deben esixirse máis e non deben permitirse o nivel de irresponsabilidade do PSOE, nin o nivel de incoherencia de Ciudadanos ou a demagoxia de Podemos.

Por ese motivo, segundo subliñou Feijóo, o PPdeG decidiu renovar as súas ideas, actitudes e equipos. Como engadiu, este partido reacciona, está activo e está en pé.

Neste senso, o líder dos populares galegos asegurou, con respecto aos outros partidos, de que non poden arrinconar á formación pola que apostaron 7 millóns e medio de españois. 

O PARTIDO DAS SOLUCIÓNS
Da mesma maneira, puxo en valor que a crise non venceu aos populares e, de feito, Galicia está saíndo dela, pasando de xerar paro a crear emprego; de decrecer, a volver a crecer economicamente; do desfase orzamentario, ao control e á responsabilidade económica e ao crecemento da produción industrial, á internacionalización, á innovación e á confianza dos consumidores e dos emprendedores.

Así, fixo fincapé en que os populares son un partido activo que non para ata dar coas solucións e vai a onde haxa que ir para atopalas. Deste xeito, onde antes había gradas baleiras, agora fanse barcos; onde antes estaban paradas as máquinas, agora faranse novos vehículos; e onde durante anos houbo un solar en Lugo, en Rozas, agora haberá investimento, emprego e seremos unha referencia de innovación en España e internacionalmente. 

Segundo aseverou, o PPdeG é o partido que representa ás galegas e os galegos: como son, como senten, como fan. É o partido do rural galego, o partido das mulleres e homes do mar e o partido do sentir maioritario das galegas e os galegos. 

Por último, Feijóo sinalou que o PPdeG non ten sentido se non está preto das galegas e os galegos e, ao mesmo tempo, asegurou que Galicia precisa deste partido, máis que nunca.


Páxina 14 de 22

Síguenos nas redes sociais