Utilizamos cookies para asegurar que damos a mellor experiencia a o usuario no noso sitio web. Si continúa utilizando este sitio asumiremos que está de acordo. Mais información Política de Cookies

Alberto Núñez Feijóo adiantou hoxe que a Xunta levará ao Parlamento unha nova lei para garantir o normal funcionamento do transporte público de viaxeiros por estrada en Galicia, logo de que o Tribunal Supremo anulase a prórroga das concesións autorizadas pola Administración autonómica a través da Lei de medidas urxentes de novembro de 2009, concretada na posterior resolución da Dirección Xeral de Mobilidade de febreiro de 2010.
 
O mandatario galego lembrou que ese texto actuou para garantir o funcionamento do servizo público ante a entrada en vigor do novo regulamento comunitario sobre a materia. E apuntou que desde 2007 o bipartito coñecía o dito regulamento e só foi quen de aprobar varios borradores de lei, polo que Galicia se expoñía a perder todas as concesións de transporte interurbano aprobadas ata o momento.
 
Pola contra, sinalou que a Xunta, coa norma de 2009, deu unha resposta ao sector nun prazo de sete meses, pactando con el unha solución similar á de outras 12 comunidades autónomas que establecía unha prórroga de dez anos para as distintas concesións. Un procedemento, dixo, que foi considerado conforme a dereito polo Tribunal Superior de Xustiza de Galicia. “Como consecuencia de que cando tomamos posesión quedaban uns meses para que fosen decaendo todas e cada unha das concesións de transporte”, lembrou, “tivemos que sacar esa lei co acordo do sector e coa abstención do partido socialista”.
 
Agora, asegurou, logo da decisión do Tribunal Supremo, a Xunta presentará unha nova lei ao Parlamento para garantir a prestación adecuada dos servizos de transporte público aos cidadáns.


O PARLAMENTO GALEGO APROBA A INICIATIVA DO GRUPO POPULAR DIRIXIDA A POÑER EN MARCHA UN SISTEMA DE MELLORA DAS COTIZACIÓNS PARA OS TRABALLADORES DO MAR



·    Entre outras vantaxes, o novo modelo de cotización fará posible un aumento considerable da dotación económica das pensións que estes traballadores recibirán unha vez que accedan á xubilación



·    Dun réxime similar a este xa se benefician os traballadores autónomos e agrarios que poden escoller unha base de cotización variable en función das súa situación económica, expectativas de beneficio ou circunstancias particulares



Santiago, 30 de marzo de 2016.- A iniciativa impulsada polo Grupo Popular dirixida á poñer en marcha un sistema de mellora voluntaria do réxime de cotización á Seguridade Social dos traballadores do Mar foi aprobada esta mañá no Parlamento de Galicia co voto favorable dos deputados populares e o apoio do Grupo Socialista e do Grupo Mixto.



O voceiro de pesca dos populares galegos, Jose Manuel Balseiro, agradeceu o respaldo recibido e puxo en valor un acordo que busca impulsar os cambios normativos que sexan precisos para ampliar e perfeccionar o sistema de protección social e laboral dos traballadores do mar e facelo, tras un proceso de diálogo co sector no que participarán as confrarías, entidades profesionais e sindicatos máis representativos, neste último caso citados expresamente no texto do acordo tras incorporar como engádega unha emenda do Grupo Mixto.


Balseiro aclarou que, entre outras vantaxes, o novo modelo de cotización fará posible un aumento considerable da dotación económica das pensións que estes traballadores recibirán unha vez que accedan á xubilación. Ademais, permitirá que cada profesional adapte as achegas que realiza á Seguridade Social en función dos seus ingresos, expectativas de beneficio ou situación económica puntual, como hoxe xa poden facer outros colectivos.



TRATAMENTO IGUALITARIO



Balseiro afondou neste argumento indicando que se trata de ofrecer aos profesionais do mar un sistema que xa existe para os autónomos e os traballadores agrarios, aos que a lei permite escoller unha base de cotización variable. Esta mesma vantaxe está prevista para os traballadores agrarios con conta propia. O portavoz popular indicou que, “para garantir un trato igualitario, debemos ofrecer aos traballadores do mar que poidan acollerse a similares vantaxes das que xa existen para estes outros profesionais”.



“Consideramos que as mulleres e homes do mar merecen este mesmo trato, a posibilidade de beneficiarse das vantaxes que implicaría un réxime de mellora voluntaria de cotizacións. Buscamos o xeito de ampliar a protección social dos nosos mariñeiros, da pesca e do marisqueo”, concluíu.

O PARLAMENTO APROBA INSTAR Á XUNTA A SEGUIR TRABALLANDO NO PLAN DE ACOLLIDA DE REFUXIADOS E FAVORECER A SÚA INTEGRACIÓN



·    A iniciativa incorpora a solicitude para que no ámbito comunitario se defenda políticas construtivas e coordinadas fronte ás ameazas dos controis fronteirizos que se cernen sobre o espazo Schengen



·    Tamén rexeita calquera acordo que contemple expulsións colectivas de refuxiados, así como a necesidade da adopción dun acordo respectuoso coa legalidade internacional e os Dereitos Humanos



Santiago, 30 de marzo de 2016.- O Parlamento galego aprobou hoxe, logo dunha transacción entre o  Grupo Popular e o Grupo Mixto, unha proposición non de lei a través da que se insta á Xunta a seguir traballando na coordinación dentro do Plan de Acollida de todos os recursos dispoñibles tanto das administracións coma das ONGs e das familias galegas, co obxectivo de favorecer a efectiva integración das persoas solicitantes de protección internacional.



Así mesmo, a iniciativa incorpora a solicitude para que no ámbito comunitario se defenda políticas construtivas e coordinadas fronte ás ameazas dos controis fronteirizos que se cernen sobre o espazo Schengen. Neste sentido, considérase que a introdución permanente de controis fronteirizos non pode ser a resposta as arelas dos cidadáns da Unión Europea de maior seguridade e protección do seu nivel de vida.



NON Á EXPULSIÓN COLECTIVAS



A proposición non de lei tamén rexeita calquera acordo que contemple expulsións colectivas de refuxiados, así como a necesidade da adopción dun acordo respectuoso coa legalidade internacional e os Dereitos Humanos, e especificamente que calquera expulsión só será posible adoptala tras a conclusión dun expediente de asilo individualizado con todas as garantías.



O portavoz de Relacións Exteriores do Grupo Popular, Gonzalo Trenor, salientou que o plan de acollida de refuxiados posto en marcha pola Xunta “non contempla só a solución habitacional nin sequera só o acollemento destas persoas, senón tamén a súa integración na sociedade dándolles a acollida pero tamén a escolarización e atención sanitaria; atendendo especialmente aos menores que non están acompañados; e, en definitiva, garantizando a adecuada integración e permitindo o acceso ós refuxiados a tódolos servizos de todas as administracións dirixidos á poboación xeral”.



Trenor lembrou que o actual Goberno galego “anticipouse con este plan propio de acollida ás peticións do Goberno central, poñéndose de inmediato á súa disposición para ofrecer en Galicia unha acollida digna e solidaria destas persoas”. Así, a Xunta asumiu a coordinación de todos os recursos materiais e humanos, tanto da administración autonómica como dos concellos ou ONGs.



“Os galegos estamos preparados para traballar cando cheguen os refuxiados”, asegurou o portavoz popular, quen engadiu que “non se trata de facilitar recursos ociosos, senón que respectar os seus dereitos”.


O GRUPO POPULAR SALIENTA QUE OS CONCERTOS COA SANIDADE PRIVADA REDUCÍRONSE UN 8,9% DESDE 2009 FRONTE AO INCREMENTO NUN 45,49% NOS CATRO ANOS DO GOBERNO BIPARTITO



·    Rodríguez-Vispo criticou a demagoxia da oposición cando “nos acusan de que existan as listas de espera en Galicia, como si só as houbera nas comunidades gobernadas polo Partido Popular”



Santiago, 29 de marzo de 2016.- A deputada do Grupo Popular Marta Rodríguez-Vispo salientou hoxe que os concertos coa sanidade privada en Galicia reducíronse desde o ano 2009 un 8,69 por cento, fronte ao incremento nun 45,49 por cento nos catro anos do Goberno bipartito. “Vostedes cando gobernan fan unhas cousas e cando están na oposición din outras, fronte ao Partido Popular que facemos o que dicimos e dicimos o que facemos”, sinalou.



Rodríguez-Vispo fixo referencia ao informe Austeridad y privatización sanitaria en época de crise: ¿existen diferencias entre las comunidades autónomas?, elaborado por investigadores da Universidade do País Vasco, no que se pon de manifestou que Galicia reduciu nos últimos anos a contratación coa sanidade privada e elevou a ratio de camas públicas.



DATOS DA OPOSICIÓN NON CONCORDAN COA REALIDADE



“Parece que estes datos non concordan moito co que a oposición di do Goberno de Feijóo, acusándoo de privatizar a sanidade galega”, manifestou a deputada popular, quen apuntou que no mesmo informe se indica que a ratio de camas públicas por cada cama privada en Galicia é das máis altas do Estado.



Na súa intervención, Marta Rodríguez-Vispo tamén recolleu os datos do último informe sobre privatización sanitaria elaborado pola Asociación para a Defensa da Sanidade Pública, que sitúan a Galicia no undécimo lugar en gasto en concertos privados.



A deputada popular criticou a demagoxia da oposición cando “nos acusan de que existan as listas de espera en Galicia, como si só as houbera nas comunidades gobernadas polo Partido Popular”. “Os recursos son limitados e para xestionar as listas de espera dun xeito eficaz se fai a derivación de pacientes a centros privados para que se lles realicen probas diagnósticas ou intervencións cirúrxicas, algo que se realiza en todos os sistemas sanitarios públicos de España independentemente da súa cor política”, apuntou.



Neste sentido, Marta Rodríguez-Vispo salientou que o actual Goberno galego está a incrementar o número de quirófanos “ampliando hospitais, como os de Salnés, Ourense ou A Coruña, ou construíndo novos hospitais públicos, como o de Vigo”. “E vostedes protestan por este aumento de recursos, a verdade é que non se entende”, sinalou.


O PARLAMENTO APROBA A LEI DE ASISTENCIA XURÍDICA DA ADMINISTRACIÓN, A ÚLTIMA DAS CINCO NORMAS DO PROGRAMA DE IMPULSO DEMOCRÁTICO ANUNCIADO POR FEIJÓO



·    Julia Rodríguez Barreira apuntou que este programa permitiu “avanzar na transparencia, na eficiencia e na busca da excelencia no funcionamento das institucións públicas autonómicas”



·    O 75% do texto da nova lei conta coa conformidade de todos os grupos parlamentarios, ademais de ter incorporado ao texto definitivo un 30% das demandas da oposición



Santiago, 29 de marzo de 2016.- O Parlamento galego aprobou hoxe, sen ningún voto en contra, a Lei de ordenación da asistencia xurídica da Administración da Comunidade galega e do seu sector público, o último dos cinco textos lexislativos do programa de impulso democrático anunciado a principios do pasado ano polo Presidente da Xunta. A portavoz de Xustiza, Julia Rodríguez Barreira, manifestou que esta nova lei permitirá “aumentar a calidade e o control da actuación administrativa, previndo os casos de posibles malas prácticas e garantindo que tanto o goberno como a súa administración actuarán sometidos á legalidade e á defensa dos intereses da Comunidade galega”.



Rodríguez Barreira indicou que o Plan de impulso democrático permitiu “avanzar na transparencia, na eficiencia e na busca da excelencia no funcionamento das institucións públicas autonómicas”. “Con ese fin, incrementouse o control sobre o financiamento dos partidos políticos; reforzouse o papel do Consello de Contas como órgano de control externo e independente; potenciouse a participación directa da cidadanía na vida parlamentaria; e aprobouse unha Lei de Transparencia e bo goberno”, indicou.



Respecto do texto lexislativo de asistencia xurídica da Administración aprobado hoxe, a portavoz popular indicou que “ofrecerá aos cidadáns a certeza do sometemento da actuación administrativa á legalidade, lonxe de toda arbitrariedade e baixo un sistema de control interno, obxectivo e rigoroso; ao tempo que se traslada a confianza de que os intereses da Comunidade galega van a estar axeitadamente defendidos polos seus servizos xurídicos”.



DISPOSICIÓN PARA O CONSENSO



Barreira puxo de manifestou a “mellor disposición” do Grupo Popular ao longo da tramitación deste proxecto de lei “para atopar puntos de encontro cos grupos da oposición na busca do maior consenso posible que permita aprobar un texto lexislativo capaz de dar resposta ás necesidades de asesoramento, control e defensa que, agora e no futuro, precise a administración autonómica, os seus entes e os seus empregados públicos”.



En concreto, subliñou que o 75 por cento do texto da lei conta coa conformidade de todos os grupos parlamentarios, ademais de ter incorporado ao texto definitivo, de modo directo ou mediante transacción, case un 30 por cento das demandas da oposición.



Julia Rodríguez destacou que a lei “establece o principio de autoprovisión na prestación da asistencia, de maneira que a Administración só acudirá de modo excepcional, cando a autoprovisión resulte inviable, a medios externos para a prestación da asistencia xurídica, e sempre baixo a supervisión da Asesoría Xurídica”. “Por primeira vez se evita a proliferación de contratos de asistencia xurídica externa que abondaron noutras etapas, e se formulan como algo excepcional”, indicou.



MELLORA DA CALIDADE NORMATIVA



A portavoz popular considerou “especialmente destacable as funcións que se atribúen á Asesoría Xurídica Xeral en relación á mellora da calidade normativa” e sinalou que “se trata de simplificar e clarificar a normativa existente, moitas veces dispersa, revisándoa e avaliándoa, pero tamén de supervisar a planificación normativa anual co mesmo fin”.



A nova lei establece, ademais, o marco de defensa dos funcionarios, autoridades e empregados públicos, esixindo uns requisitos para autorizar a súa defensa, pero se no curso do procedemento se acredita que non se cumpren tales requisitos debe existir a posibilidade de revogación da autorización.



Rodríguez Barreira salientou, por último, que esta lei facilita a loita contra a corrupción a través de medidas como incorporar a función coordinadora da Asesoría Xurídica Xeral nas comunicacións entre o sector público autonómico e o Consello Consultivo; a participación da Asesoría Xurídica na  elaboración dos plans de prevención de riscos de corrupción; ou evitando vínculos entre as empresas convidadas nos procedementos negociados.





MIGUEL TELLADO CONSIDERA “NECESARIA” A REFORMA DA LEI DE POLICÍAS LOCAIS E SALIENTA QUE CHEGA AO PARLAMENTO “CO CONSENSO DOS CONCELLOS E OS PROFESIONAIS”



·    O portavoz de Administracións Públicas explicou que esta “reforma garantista elimina discriminacións arbitrarias e recoñece dereitos para o desenvolvemento da carreira profesional”



Santiago, 29 de marzo de 2016.- O portavoz de Administracións Públicas do Grupo Popular, Miguel Tellado, considerou necesaria a modificación da Lei de policías locais de Galicia, cuxo proxecto de lei foi tomado en consideración esta mañá polo Pleno do Parlamento, porque “aporta seguridade xurídica aos concellos e  mellora o funcionamento das policías locais existentes en Galicia”. Así mesmo, Tellado subliñou que este texto lexislativo “chega ao Parlamento co consenso dos concellos e cos profesionais aos que vai dirixida”, polo que considerou “sorprendente” que AGE e o Grupo Mixto “pretendan poñerlle freo” coas súas emendas á totalidade.



Miguel Tellado manifestou que o proxecto de lei permitirá levar adiante unha reforma garantista da Lei de policías locais de Galicia aprobada polo Goberno  bipartito en 2007, eliminando discriminacións arbitrarias e recoñecendo dereitos para o desenvolvemento da carreira profesional nas policías locais galegas.



“Trátase dunha reforma fundamental que vai facilita aos concellos garantías para a cobertura das prazas necesarias para prestar o servizo”, indicou o portavoz popular, quen apuntou que “deseña mecanismos máis flexibles para cubrir as prazas de promoción interna, realizar permutas e facilitar o mantemento das prazas existentes”.



O portavoz popular lembrou que esta iniciativa “estaba presente no programa electoral co que o Partido Popular de Galicia se presentou ás eleccións autonómicas de 2012 co obxectivo de “aportar seguridade xurídica aos concellos e nas actuacións municipais que eviten dúbida na prestación destes servizos públicos”.



A LEI QUE QUEREN CONCELLOS E PROFESIONAIS



“É o texto lexislativo que queren os concellos e os axentes das policías locais de Galicia, xa que foi aprobado por unanimidade pola Comisión de Coordinación de policías locais”, sinalou.



Respecto das emendas á totalidade presentadas por AGE e o Grupo Mixto, Tellado considerou “sorprendente que decidan poñerlle freo a un proxecto que ven avalado polos sindicatos e as organizacións profesionais”. “Fanlle oposición a Galicia porque queren parar Galicia e que  nada funcione, xa que pensan que canto peor lle vaia a Galicia, mellor lles irá a vostedes”, dixo.



“Din non a este proxecto cando en ningunha das súas emendas hai reparo algún ao recollido na reforma da lei, polo que a súa emenda á totalidade é ao proxecto do bipartito”, explicou. Así mesmo, Miguel Tellado puxo de manifesto a súa incongruencia porque consideran que a “reforma é necesaria pero queren devolverlla ao Goberno, porque todo lles vale con tal de atacar á Xunta, incluso levándolle a contraria aos axentes da policía local galega”.

Santiago de Compostela, 28 de marzo de 2016.- O voceiro do PPdeG, Miguel Tellado, pediu a AGE que respectara o proxecto industrial para o Aeródromo de Rozas, sinalando que os que fan do paro un negocio político non son os máis adecuados para orientar a política industrial da Xunta de Galicia.
 
O portavoz dixo que AGE ten unha obsesión clara por ir en contra dos investimentos de empresas privadas en Galicia, e recordou o intento dese partido de bloquear a ampliación da planta PSA Peugeot-Citroën en Vigo, que posibilitaría a construción de furgonetas nesa factoría e unha enorme carga de emprego para a cidade.
 
Ademais, Tellado lembrou que AGE e os partidos dos que procede estiveron  en contra do acordo con Pemex e agora se opoñen tamén a inversión de 75 millóns de euros que situarán a Galicia como un  referente nacional e internacional na investigación no campo dos avións non tripulados. 
 
“AGE está en contra de calquera proxecto que xere emprego e riqueza para Galicia, algo propio dun partido que se alimenta da desesperanza da xente e das persoas que están ao límite por non ter traballo”, engadiu.
 
Segundo o voceiro, atendendo as súas actuacións, “semella que queren que a primeira cidade galega teña máis paro forzando a saída de PSA de Vigo; que a comarca de Ferrolterra e resto de cidades que viven do naval siga tendo sobre si a ameaza de peche dos estaleiros; e, agora, tamén é posible que non queiran unha inxección de capital para fixar poboación e emprego na provincia de Lugo”.
 
O portavoz sinalou que o feito de que cuestionen hoxe criterios de adxudicación coñecidos dende fai oito meses amosa “ou que non consultaron os pregos por pereza, que sería moi grave; ou que téndoo feito non atoparon nada irregular e intentan ensombrecer o proceso agora e sen ningún motivo, algo máis grave aínda”.
 
Para Tellado, AGE volveu actuar unha vez máis de forma totalmente irresponsable mentindo e vertendo falsidades sobre un dos investimentos industriais máis importantes da historia da provincia de Lugo e de Galicia, tentando manchar así a imaxe da comunidade e dun proceso exemplar, que acaba de ser premiado a nivel nacional polo seu rigor e transparencia.
 
O portavoz tamén destacou que a política de captación de investimentos que leva a cabo a Xunta é posible porque hai un Goberno sensato que xera estabilidade na nosa comunidade, xusto o contrario do que sería unha Administración liderada por un multipartito no que estivera AGE e o resto de partidos da oposición parlamentaria en Galicia.
 
 


PUY SALIENTA QUE O PLENO DEBATE MAÑÁ A APROBACIÓN DEFINITIVA DA LEI DE ASESORÍA XURÍDICA DA XUNTA, QUE CULMINA O PLAN DE IMPULSO DEMOCRÁTICO ANUNCIADO POR FEIJÓO



·    Este plan incorporou a Lei de transparencia e bo goberno, a reforma do Consello de Contas, a Lei de financiamento de partidos políticos e a lei de iniciativa lexislativa popular e participación cidadá



·    O Pleno incorpora o debate de toma en consideración da modificación da Lei de policía local de Galicia



Santiago, 28 de marzo de 2016.- O portavoz do Grupo Popular, Pedro Puy, salientou hoxe que o Pleno desta semana procederá ao debate para a aprobación do proxecto de Lei da asistencia xurídica da administración xeral da comunidade autónoma e do seu sector público, que culmina o plan de impulso democrático anunciado por Feijóo no mes de xaneiro do pasado ano no que tamén se incorporan outros catro proxectos lexislativos.



Puy sinalou que a sesión plenaria que se celebra mañá e o mércores terá “un marcado carácter sanitario”, coa comparecencia do conselleiro de Sanidade a petición propia para explicar a estratexia SERGAS 2020, á que se sumarán tres mocións e tres proposicións non de lei relativas a cuestións sanitarias.



No ámbito dos proxectos lexislativos, o portavoz popular indicou que na sesión plenaria procederase ao debate de toma en consideración do proxecto de Lei que modifica a Lei de coordinación de policías locais. Neste sentido, explicou que este texto “mellora a eficiencia e eficacia organizativa destes corpos de seguridade, coa introdución de cuestións como a eliminación do tope de idade dos 36 anos para acceder á policía local galega; a mellora nos procesos de cobertura de prazas de mandos, que facilita tanto a promoción interna, como a mobilidade con ascenso desde outros corpos; e a eliminación da dispensa dun grao na titulación, recollido na Lei anterior para determinados procesos de integración e de promoción”.



FUNCIÓNS DA ASESORÍA XURÍDICA



Porén, Puy fixo especial referencia ao debate para aprobación do proxecto de Lei de asistencia xurídica da administración xeral da comunidade autónoma e do seu sector público. En concreto, este texto pretende regulamentar e establecer con carácter certo e legal as funcións da asesoría xurídica, dotándoa dun maior control da legalidade, da transparencia, da mellora da calidade lexislativa, da loita contra a corrupción e, en definitiva, dunha maior defensa dos dereitos dos cidadáns.



Esta norma “establece claramente cal é o comportamento da asesoría xurídica nos casos de que algún membro da administración estea suxeito a un procedemento xudicial”, indicou Puy. Así, apuntou a existencia dun problema cando “a asesoría xurídica asume a defensa dunha persoa investigada porque entende que a súa actuación foi conforme a dereito, pero na práctica da investigación xudicial se pode chegar á conclusión de que a Administración autonómica foi prexudicada pola actuación desa mesma persoa”.



Pedro Puy manifestou que coa aprobación deste proxecto de Lei “queda culminado” o plan de impulso democrático anunciado polo Presidente en xaneiro do pasado ano. Neste sentido, lembrou que este plan incluía a Lei de transparencia e bo goberno, que xa está vixente e se empeza a traducir nas distintas páxinas web da administración autonómica; a lei que reforma o Consello de Contas, que tamén está en marcha e xa se anunciou que o plan de traballo para 2016 incorpora as primeiras actuacións en materia de prevención da corrupción; a nova lei de financiamento de partidos, da que xa se convocaron axudas que impiden ás distintas forzas políticas percibir doazóns de empresas ou de persoas que formen parte dos seus consellos de administración; e a lei de iniciativa lexislativa popular e participación cidadá na Cámara, a través da que os cidadáns xa poden presentar a través do portal web do Parlamento iniciativas de impulso como de control do Goberno galego.



O  Grupo Popular tamén defenderá na sesión plenaria dúas proposicións non de lei: unha primeira, sobre a apertura do túnel do Parrote en A Coruña, despois de cen días desde que a obra se recepcionara; e outra solicitando que se impulsen os cambios normativos necesarios para que os traballadores do mar poidan mellorar de xeito voluntario as súas bases de cotización.



CANDIDATURA FEIJÓO



Cuestionado sobre a posible candidatura de Feijóo á Presidencia do PPdeG e á Xunta de Galicia, Pedro Puy sinalou que “Feijóo abriu un proceso de renovación no partido, que empezou polo goberno, continuou cos congresos provinciais, a renovación de ideas a través do debate de ponencia política e finaliza coa celebración do Congreso autonómico, no que se elixe o Presidente do partido que despois será o candidato a Presidente da Xunta”. “Está máis que claro que non hai un proxecto esgotado nin outro motivo que o respecto a un proceso que o propio Presidente abriu para a  renovación de ideas, de persoas e de  equipos directivos”, engadiu.



Neste sentido, reiterou que “confío e desexo que unha das persoas que presenten a súa candidatura sexa o actual Presidente galego, que está a facer unha magnífica labor á fronte da Xunta”.

Santiago, 23 de marzo de 2016.- Alberto Núñez Feijóo subliñou hoxe tras o Consello da Xunta que a posta en marcha do novo Programa Reacciona, dotado con 9 millóns de euros, permitirá ás pemes galegas mellorar a súa competitividade e facilitar o seu crecemento. “Estamos a falar dun programa renovado e ampliado, que ten como obxectivo facilitar a reinvención da empresa, a mellora da súa competitividade e o crecemento da mesma”, aseverou.

Nun primeiro termo, Feijóo explicou que este ano o programa se estrutura en tres convocatorias distintas: a terceira edición do Reacciona; a primeira edición do Reacciona TIC; e unha nova edición das Bolsas Reacciona. Todo elo co obxectivo de que os 9 millóns de euros de investimento que ten o programa permitan o desenvolvemento de 1.500 proxectos, que benefician a preto de 1.000 empresas.

No tocante á terceira edición do Reacciona, o responsable autonómico precisou que está dotado con 5,5 millóns de euros e permitirá que 600 pemes se beneficien de 1.000 proxectos de mellora en ámbitos como o financeiro, de produción, comercial ou estratéxico. “Trátase de apoiar ás pequenas e medianas empresas na profesionalización dos seus equipos directivos como paso previo ao seu crecemento ou internacionalización”, engadiu.

Así mesmo, subliñou que a empresa pode escoller o seu itinerario personalizado de mellora segundo as súas necesidades, apoiándose nun ou varios servizos que van desde un diagnóstico inicial e gratuíto, ata a execución de plans operativos, así como unha análise estratéxica detallada que marca o rumbo futuro da empresa.

Sobre a primeira convocatoria do Programa Reacciona TIC, Feijóo afirmou que esta iniciativa, froito da colaboración entre o Igape e a Amtega, contará con preto de 2,5 millóns de fondos co obxectivo de traballar coas empresas TIC, que dan emprego a 15.000 persoas en Galicia.

“Prevense neste eido 500 proxectos de mellora, correspondentes a unhas 300 empresas”, precisou o presidente do Goberno galego, ao que engadiu que a Xunta ofertará un catálogo de servizos ás pemes para a diagnose, asistencia e soporte na implantación de solucións nos ámbitos de empresa dixital e Industria 4.0. Estes apoios inclúen, por exemplo, o diagnóstico sobre a implantación de solucións dixitais e de Industria 4.0; o acompañamento na posta en marcha de solucións tanto organizativas como tecnolóxicas; o soporte para a adopción e despregamento de solucións en mobilidade; ou o apoio á posta en marcha de estratexias de Marketing Dixital.

Por último, Feijóo destacou tamén a convocatoria dunha nova edición das bolsas Reacciona, para a contratación de 100 mozos recentemente titulados, que apoiarán ás empresas ao longo da duración do Reacciona, gañando experiencia profesional e abrindo unha fiestra ao mercado laboral.

O responsable autonómico lembrou que durante as anteriores edicións destas bolsas beneficiáronse delas 200 mozos, “e máis da metade dos participantes conseguiron a inserción laboral de inmediato en canto remataron a bolsa”.

Alberto Núñez Feijóo fixo hoxe balance das actuacións de control que levou a cabo a Axencia Tributaria de Galicia (Atriga) no ano 2015. “Logrou máis ingresos, máis comprobacións e máis facilidades para que os cidadáns poidan cumprir coas súas obrigas”, subliñou.
 
Así, a Atriga conseguiu que aflorasen 150 millóns de débeda non declarada e que crecese un 20 por cento o importe obtido polo labor de inspección, que o ano pasado ascendeu a 39,3 millóns. Esta Axencia encárgase principalmente de recadar o imposto de transmisións patrimoniais e actos xurídicos documentados (ITP-AXD) e o de sucesións e doazóns (ISD).
 
“Logramos máis ingresos porque, en termos homoxéneos, ingresamos un 14 por cento máis que en 2014 —explicou Feijóo—. Máis comprobacións porque revisamos case 265.000 autoliquidacións de impostos, un 2 por cento máis que en 2014, aínda que nese ano houbo un plan especial de control”. Isto supón que cada semana os traballadores da Atriga comproban máis de 5.000 autoliquidacións.
 
Ademais, o xefe do Executivo autonómico lembrou que a Axencia Tributaria galega concedeu máis facilidades aos cidadáns, pois o importe dos aprazamentos e fraccionamentos ascendeu a 24,5 millóns. Así, desde o pasado sábado, a cantidade pola que os contribuíntes poden pedir que se aprace ou fraccione o pagamento dun imposto sen ter que presentar unha garantía ascendeu de 18.000 a 30.000 euros. Desde 2009, a media anual de aprazamentos ascende a 23,7 millóns, máis do dobre que entre 2005 e 2008. “Durante a crise económica houbo un incremento do número de aprazamentos, pero desde o ano pasado estamos nunha etapa de meseta onde xa non están aumentando as solicitudes de pagamento fraccionado. No 2015, de feito, son menos ca no 2014”, indicou o presidente.
 
Os galegos responderon a estas facilidades e demostraron que, maioritariamente, “son bos pagadores”. O 88 por cento das autoliquidacións do ano pasado eran correctas e non tiveron que ser modificadas. Nos casos que había erros, a Atriga practicou unha liquidación.
 
Baixadas de impostos
“Os galegos cumpren axeitadamente e nós tamén intentamos cumprir cos galegos coa maior baixada de impostos nun só ano da historia da autonomía”, dixo Feijóo. Convertémonos nunha das comunidades co IRPF máis baixo para as rendas medias e baixas e eximimos do pagamento do imposto de sucesións e doazóns ao 99 por cento dos cidadáns que reciban herdanzas como pais, fillos, netos, avós e cónxuxes e permitimos que o 1 por cento restante pague menos.
 
Ademais, implantamos o programa de impostos cero no rural, que supón a eliminación do ITP para transmisións de predios, solo rústico e explotacións agrarias e a ampliación destas últimas e a supresión do imposto de actos xurídicos documentados para as agrupacións de predios rústicos. “Esperamos e desexamos que isto vaia mobilizando terras e ordenando de forma correcta con todas as facilidades tributarias o noso rural”, concluíu.
Páxina 12 de 22

Síguenos nas redes sociais