O Parlamento insta á Xunta a avanzar na conservación e difusión da toponimia tradicional galega

05 Dec 2017 Written by
Rate this item
(0 votes)

Santiago, 5 de decembro de 2017.- O Parlamento de Galicia aprobou hoxe unha proposición non de lei a través da que se insta á Xunta de Galicia a avanzar na conservación e difusión da toponimia tradicional galega, nomeadamente a través dos traballos de xeorreferenciación do nomenclator e microtoponimia, así como o desenvolvemento da aplicación colaborativa para a revisión, corrección e actualización do nomenclator de Galicia.

 


Así mesmo, e logo dunha transacción co BNG, a proposición non de lei incorporou a solicitude para que se restitúa a toponimia legal nos lugares nos que non se cumpra a normativa, instando a todas as administracións públicas para que utilicen en todos os ámbitos os topónimos oficiais cuxa única forma legal é a galega.

 


A deputada popular María Antón lembrou que “correspóndelle á Xunta determinar os nomes oficiais dos municipios, territorios, núcleos de poboación, vías de comunicación interurbanas e dos topónimos de Galicia”, ao tempo que a lei reserva para os concellos a determinación dos nomes oficiais para as vías urbanas no seu termo municipal.

 


ESFORZOS E AXUDA DE TODOS

 


Na actualidade, o nomenclátor das catro provincias galegas recolle máis de 41.000 topónimos revisados e máis de 3.500 estudados con profundidade. “Os topónimos maiores, os importantes que se refiren a concellos, a parroquias e aldeas xa está realizado, pero non é suficiente”, sinalou María Antón.

 


“Este é o momento da microtoponimia, para evitar que se perdan as referencias máis precisas de cada lugar, tanto na súa parte física, orográfica, de flora e fauna; como na parte costumbrista, social, mesmo imaxinaria coas lendas e mitos”, indicou a deputada popular.

 

Antón considerou evidente que “este traballo require dos esforzos e axuda de todos para preservar o importante patrimonio colectivo que atesouramos como sociedade, que forma parte da idiosincrasia do noso pobo e que temos a obriga de legar ás xeracións que nos sucedan”.

Read 101 times

Síguenos nas redes sociais