Utilizamos cookies para asegurar que damos a mellor experiencia a o usuario no noso sitio web. Si continúa utilizando este sitio asumiremos que está de acordo. Mais información Política de Cookies

Tellado destaca en Monforte a mellora da sanidade pública co goberno de Feijóo

08 Ago 2016

Monforte de Lemos, 08 de agosto de 2016.- O secretario xeral dos populares galegos, Miguel Tellado, fixo hoxe balance da actuación do goberno de Feijóo na área de Monforte nunha rolda de prensa na que estivo acompañado polos deputados Julia Barreira e Ángel Camino.

O número dous do PPdeG quixo por en valor os “feitos” que diferenzan ao PPdeG daqueles que só teñen palabras. “Mentres a oposición vai cada día a peor, Galicia vai a mellor”, salientou Tellado.

UNHA GALICIA E UN MONFORTE MELLORES PARA VIVIR
O secretario xeral do PPdeG quixo salientar que as distintas melloras na calidade de vida dos galegos acadadas grazas ás medidas tomadas polo goberno de Feijóo ao longo destes anos.

Comezando pola sanidade pública, Miguel Tellado lembrou que conseguiuse unha maior eficiencia, pois ao tempo que se está a realizar un maior número de intervencións cirúrxicas e de consultas hospitalarias anuais que en 2009, o tempo medio de espera de ambas atópase nos datos máis baixos dende que existen rexistros de listas de espera.

Tellado considerou que estes datos se contextualizan pola mellor organización das estruturas sanitarias, pola súa mellor dotación tecnolóxica coa implantación ao 100% da receita electrónica e da historia clínica electrónica así como polo plan de infraestruturas que ten levado a que “sete de cada dez galegos” viran construír ou reformar o seu centro sanitario de referencia.

No caso da área de Monforte, a deputada Julia Rodríguez exemplificou esa mellora coa execución de reformas por valor de case 400.000 euros no hospital comarcal, que redundaron na posta en marcha de novos servizos sanitarios como a consulta de alerxias, a proba de amniocentese ou o hospital de día onco-hematolóxico.

Na atención social, o número dous dos populares galegos destacou cifras como a diferenza entre os 14.000 dependentes atendidos en 2009 e os 50.000 que o estarán a finais desde 2016 ou os 2.700 usuarios do servizo de axuda no fogar de 2009 fronte aos máis de 12.000 deste exercicio.

Pola súa banda, a deputada Julia Rodríguez lembrou o avance das políticas de atención social na área de Monforte, destacando o incremento de prazas concertadas para persoas con discapacidade.
Tellado puxo en valor tamén as melloras da vertebración territorial a través do aumento da rede autonómica de estradas que permite que o 80% dos galegos estea a menos de 15 minutos dunha vía de altas prestacións.

Este aumento da vertebración territorial plasmouse na área de Monforte con obras como o remate da vía de altas prestacións ata Sarria tras un investimento total de 135 millóns de euros, tal e como se encargou de lembrar a deputada Julia Rodríguez.

GALICIA E MONFORTE, CRECENDO E CON MÁIS EMPREGO
O número dous dos populares galegos lembrou a “tendencia á alza” do emprego nestes momentos, en contraste coa tendencia á baixa que imperaba cando Feijóo accedeu ao goberno. Lembrou que taxa de paro é 3 puntos inferior á existente no comezo da lexislatura e que hai case 50.000 afiliados máis á seguridade social.

Tellado atribuíu as melloras de emprego e crecemento económico a políticas da Xunta que melloran a empregabilidade das persoas traballadoras como poden ser o incremento dun 50% das prazas de Formación Profesional dende 2009 ou a accesibilidade das ensinanzas universitarias ao ter as taxas máis baixas do Estado.

Asemade, lembrou que a mellora do emprego vén derivada de que a solvencia de Galicia ten permitido que levemos once trimestres seguidos con taxas positivas de crecemento interanual do PIB.
Tellado defendeu este “crecemento sólido”, non baseado no recurso a débeda como noutras Comunidades Autónomas senón en melloras estruturais da economía como o “récord histórico de exportacións” acadado o pasado ano e que vai camiño de superarse neste ou os “máximo histórico” de visitantes turísticos conseguido no primeiro semestre deste mesmo ano.

A este crecemento deu explicación polas maiores facilidades dadas ao emprendemento a través da eliminación de licenzas municipais, da creación de deducións fiscais para a capitalización de novas empresas ou das bonificacións para o acceso ao solo empresarial.

Incidiu tamén o secretario xeral dos populares galegos nas novas oportunidades xeradas no medio rural por iniciativas como o programa de impostos cero para transmisións e agrupacións de fincas rústicas, a extensión das redes de internet de alta capacidade ao rural ou a posta en valor do material forestal a través do impulso da biomasa como fonte de enerxía nas industrias, nos fogares e nos edificios públicos, incluíndo  o propio hospital comarcal.

En concreto para a área de Monforte, a deputada Julia Rodríguez quixo lembrar o impacto positivo para a actividade económica que tiveron medidas como o investimento en urbanizar e dotar de accesos ao Porto Seco así como a inclusión do Camiño do Inverno como ruta oficial do Camiño de Santiago na nova Lei de Patrimonio Cultural.

GALICIA, MELLOR PARA TODOS
O secretario xeral do PPdeG quixo facer notar que a melloría de Galicia con Feijóo tense trasladado a todo o territorio e que “estas liñas de traballo global teñen unha concreción local en cada zona de Galicia”.

Non obstante, Tellado quixo lembrar que esta “melloría para todos” non só ten unha tradución territorial senón tamén social, dado que a mellora da situación orzamentaria da Xunta ten permitido poñer en marcha novas políticas para os colectivos máis vulnerables como poden ser o programa de inserción laboral das vítimas de violencia machista, o programa de realoxo en vivendas baleiras das persoas desafiuzadas ou as axudas para pagar a factura eléctrica ou o material escolar ás familias con máis dificultades.

AS PRIMARIAS DAS MAREAS, “UNHA TOMADURA DE PELO”
O número dous dos populares galegos tamén cargou contra o proceso de “primarias de paripé” emprendido polas Mareas, das que concluíu que “rematan antes de empezar” posto que “a cúpula impuxo un candidato fabricado por eles mesmos”.

“Nós xa estamos afeitos a que a cúpula das Mareas non respecte aos nosos votantes pero semella que agora nin sequera respectan aos seus propios”, afirmou Tellado, cualificando de “tomadura de pelo” as “falsas primarias” feitas co único obxectivo de “xubilar a Beiras”. O secretario xeral do PPdeG lembrou que membros da cúpula das Mareas teñen cualificado de “innegociable” a un único candidato e ironizou con que a presunta “campaña electoral” das primarias se produza de xeito “exprés”, en tres días e “na ponte de agosto”.

Síguenos nas redes sociais