Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Tellado: “En Madrid hai constituído un multipartito de PSOE, Podemos e BNG no que ninguén defende os intereses de Galicia”

14 Feb 2020

14, febreiro, 2020. O secretario xeral do PPdeG, Miguel Tellado, asegurou que en Madrid hai constituído un multipartito de PSOE, Podemos e BNG no que ninguén defende os intereses de Galicia. “Se ese é o modelo que queren traer á Xunta, os galegos xa deben saber o que poden agardar deles”, precisou.

 

Como recordou, esta semana votáronse no Congreso e no Senado dúas iniciativas para reclamar ao Goberno central que pague ás Comunidades os 2.500 millóns de euros que lle debe polo IVE polo ano 2017, dos que a Galicia lle corresponden máis de 200 millóns. Lamentablemente, a iniciativa presentada polo Grupo Popular non contou co apoio das formacións políticas con representación na Cámara galega: o PSOE votou en contra, cando en Galicia decidiu absterse; e o BNG e Podemos fixeron o mesmo, malia que votaron a favor desta devolución na Comunidade.  

 

“Este cambio de posición respecto da posición fixada polo Parlamento de xeito case unánime e sen votos en contra é absolutamente inadmisible”, afirmou mentres recoñecía que contaban con que o PSdeG e os deputados de Podemos Galicia cambiasen de postura con respecto ao IVE e acabasen votando en contra dos intereses da Comunidade. Sen embargo, subliñou que o cambio de opinión do BNG só se pode entender dentro da súa estratexia de sempre: aparentar ser combativos, pero acabar aplaudindo todo o que fai o PSOE.

 

NON XOGAR COA INDUSTRIA ELECTROINTENSIVA

Por outra banda, referiuse á desconformidade que comparten coa Xunta as empresas electrointensivas galegas e os seus traballadores polo Estatuto aprobado polo Goberno central, xa que non soluciona os seus problemas. “Galicia non precisa aprobar un Estatuto sen máis, o que precisa son medidas efectivas que solucionen o problema e rebaixen o prezo da electricidade”, engadiu confirmando que os populares están dispostos á saír á rúa para defender aos traballadores da nosa industria electrointensiva.

 

Segundo recoñeceu, as medidas que inclúe non logran rebaixar o prezo eléctrico ata os 35-40 euros por Megavatio/hora e, polo tanto, non permiten á nosa industria competir en igualdade de condicións co resto de Europa. “Non entendemos por que o Goberno de Sánchez decide obviar todas as propostas presentadas desde Galicia”, dixo facendo referencia á incorporación da categoría dos consumidores hiperelectrointensivos, aos descontos nas peaxes de transporte, á compensación do imposto de xeración e á supresión do céntimo verde ao carbón.

 

Ademais, sinalou que o Executivo central tamén decidiu incrementar o número de posibles empresas beneficiarias de 119 a 600, un aumento que favorece sobre todo a Cataluña e o País Vasco e prexudica á industria que consume máis electricidade, como é o caso de Galicia.

 

“O Goberno non pode seguir xogando coa industria electrointensiva galega, co presente e o futuro 5.000 familias que dependen dela, e non pode empregar tamén a industria para contentar aos seus socios”, manifestou engadindo que Sánchez debe tomar algunha decisión que busque solucionar os problemas de Galicia e que non só estea pensada para seguir sobrevivindo politicamente.

 

UN PARTIDO ACTIVADO, MOBILIZADO E ILUSIONADO

Por último, Tellado falou do acto que os populares desenvolverán este sábado en Vigo no que celebrarán a proclamación oficial de Alberto Núñez Feijóo como candidato do PP á Xunta de Galicia.

 

Como apuntou, será un evento masivo que contará con cerca dun milleiro de persoas e que dará testemuño de que o partido está máis activado, mobilizado e ilusionado que nunca para conseguir a cuarta maioría absoluta coa que seguirlle dando a Galicia a estabilidade e o crecemento que merece e que necesita. 

Síguenos nas redes sociais