Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Jackeline Fernández substituirá a César Fernández, novo alcalde de Ribadavia, como deputada do Grupo Popular

17 Jun 2019

Santiago, 17 de xuño de 2019.- O viceportavoz do Grupo Popular, Miguel Tellado, avanzou hoxe que Jackeline Fernández Macías será a nova deputada do Grupo Popular pola provincia de Ourense, en substitución de César Fernández Gil, que foi nomeado este sábado alcalde de Ribadavia.

 

Miguel Tellado felicitou hoxe a “todos os novos alcaldes galegos, especialmente aos do Partido Popular e cunha especial mención a César Fernández Gil, que foi voceiro de Cultura e Educación do Grupo Popular ata o pasado sábado e cuxa marcha motivará o nomeamento de novos portavoces nestas áreas dentro deste grupo parlamentario”.

 

Logo da reunión dos deputados do Grupo Popular para preparar os asuntos que levarán mañá á Xunta de Portavoces para incorporar á sesión plenaria da vindeira semana, Tellado avanzou a previsión de que no Pleno se debata a aprobación definitiva do proxecto de lei de ordenación farmacéutica, un novo texto lexislativo que permitirá adaptarse aos múltiples cambios sociais que houbo desde a aprobación da anterior lei hai dúas décadas.

 

DOBRE OBXECTIVO

“En resumo, a lei ten un dobre obxectivo: por unha banda, recoller as novidades de regulación que se introduciron desde 1999; e, por outra, solucionar de xeito eficaz as necesidades e demandas actuais dos usuarios e profesionais das farmacias”, concretou o viceportavoz popular. Ademais, esta nova  lei contempla a axilización dos concursos públicos para as novas farmacias, a regulación da venda por Internet e a introdución da posibilidade da atención farmacéutica a domicilio.

 

Así mesmo, a sesión plenaria incluirá o debate de totalidade do proxecto de lei de patrimonio natural de Galicia, que consolida a prevalencia da protección ambiental sobre a ordenación territorial e urbanística. Miguel Tellado explicou que esta nova lei “adapta o actual texto de 2001 ás novidades que se produciron nos últimos anos, para aproveitar a experiencia acumulada e para incorporar melloras e delimitar claramente as competencias da Comunidade”.

 

Como principais novidades, este novo texto lexislativo avanza na protección do noso patrimonio natural e establece mecanismos de cooperación con outras administración.

Síguenos nas redes sociais