Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Feijóo pide o voto para o PP porque será un Goberno para todos que ten en conta a Galicia

16 Abr 2019

16, abril, 2019. O presidente do PPdeG, Alberto Núñez Feijóo, pediu nun mitin en Xinzo o voto para o Partido Popular xa que será un Goberno para todos que terá en conta a Galicia.

O líder dos populares galegos amosouse preocupado polas desigualdades contra as que o Goberno de España debe combater e non acentuar. Nese senso, expresou que o PP cre na igualdade de todos os españois e iso pasa por un Executivo central que goberne para todos e non só para aquelas formacións ás que debe o seu apoio.

 

De igual xeito, admitiu que os populares queren un Goberno que pelexe contra a desigualdade entre mulleres e homes, posto que aínda faltan pasos por dar e trátase de algo que non se pode lograr fomentando a división, senón coa unión de todos -administracións, partidos e sociedade-.

 

No tocante á desigualdade económica, manifestou que non se loita contra ela apertando aínda máis a quen puido resolver o seu problema de desemprego coma se lles sobrase de todo, xa que hai que favorecer que se cren oportunidades e emprego. “A igualdade hai que lograla por arriba e non por abaixo”, engadiu.

 

“Queremos un Goberno de España que combata contra a desigualdade na prestación dos servizos públicos”, recoñeceu incidindo en que a solución se basea en acadar un financiamento autonómico que teña en conta que prestar os servizos aos maiores e nos pobos ten un custo superior que hai que afrontar, non nun pacto entre o Executivo e os independentistas que só miran polo seu ben.

 

Feijóo tampouco esqueceu o problema da falta de igualdade en canto ás infraestruturas, salientando que, en vez de investir máis nos sitios que máis teñen, deberíase destinar “todo o necesario nos lugares que levamos anos, décadas, esperando polo AVE, por conexións interiores de autovías ou por unha política de peaxes con sentido común”.

A IMPORTANCIA DE GALICIA E DE ESPAÑA

“Galicia non quere máis que ninguén pero non pode admitir que se lle trate coma se fose menos”, asegurou o presidente do PPdeG mentres aseveraba que a nosa Comunidade é sinónimo de esforzo, compromiso e solidariedade, pero que tamén quere igualdade.

 

Neste sentido, cuestionou que o PSOE diga no seu slogan que quere ao país cando “non se pode querer a España se demostras que non queres a Galicia”, e que outros partidos se enchan a boca coa palabra España ao tempo que defenden unha nación incompleta ignorando a nosa Comunidade ou crendo que dicir Galicia os converte en nacionalistas.

 

“A nós impórtanos Galicia porque nos importa España e impórtanos España porque nos importa Galicia”, subliñou antes de indicar que os populares defenden a Constitución enteira, sen saltarse ningún dos seus parágrafos: a igualdade de todos os españois, a liberdade, a convivencia, o respecto e o sentido común, o Estado das Autonomías, a unidade do país, o galego e o castelán, e tanto Galicia como España.

Síguenos nas redes sociais