Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Pedro Puy afirma que “existen mecanismos para que Estado e Xunta comecen a facer negociacións” sobre a transferencia da AP-9 a Galicia

24 Sep 2018
Santiago, 24 de setembro de 2018.- O portavoz do Grupo Popular, Pedro Puy, afirmou hoxe que, unha vez que o Goberno central amosou a súa “boa vontade” levantando o veto á transferencia da AP-9 á Comunidade galega, “existen mecanismos que permiten que o Estado e a Xunta comecen a facer negociacións, que despois podan ter reflexo nas emendas que os grupos parlamentarios no Congreso presenten á proposición de lei remitida polo Parlamento galego”.
 
 

 

Puy explicou que as proposicións de lei remitidas polos parlamentos autonómicos ao Congreso “están abertas a modificacións a través de emendas” dos grupos parlamentarios na Cámara Baixa. Deste xeito, salientou a importancia de que se tramite a proposición de lei, pero, “con independencia do seu contido final, debería existir un acordo de transferencia entre a Xunta e a Administración Xeral do Estado”.
 
 

 

“Todo o que é a valoración económica sobre o traspaso definitivo da AP-9 é froito dunha negociación” entre a Xunta e o Goberno central, polo que o portavoz popular sinalou que “o importante é que se produza esa transferencia por acordo entre as dúas administracións”.
 

 

 

Pedro Puy referiuse “á boa vontade” do Goberno de España levantando o veto á tramitación da proposición de lei, pero “sería bo que se aclarase se se corresponde coa mesma vontade de facer a transferencia”. “Ao final ten que haber unha lei de transferencia, que pode avanzar se hai vontade por parte da Administración Xeral do Estado pedindo a convocatoria das comisións correspondentes que avalíen o custo desa transferencia, que se levarían á citada lei para o traspaso a Galicia da AP-9”.
 

 

 

MEMBROS DAS COMISIÓNS DE INVESTIGACIÓN
 
 

 

O portavoz popular informou que a reunión do Grupo Popular celebrada esta mañá decidíronse os membros que formarán parte das comisións de investigación sobre a sanidade pública e sobre o accidente do Marisquiño en Vigo.
 
 

 

En concreto, Aurelio Núñez Centeno, Marta Rodríguez Arias, Encarna Amigo, Marta Rodríguez-Vispo, José González Vázquez, Antonio Mouriño e Jesús Miguel Prado Patiño serán os representantes do PPdeG na Comisión de Sanidade; mentres que Teresa Egerique, Alberto Pazos, Marían García Míguez, Paula Prado, Cristina Romero, Jaime Castiñeira e Jacobo Moreira formarán parte da Comisión do Marisquiño.
 

 

 

Pedro Puy tamén lembrou que o Grupo Popular defenderá no Pleno do Parlamento que se celebra esta semana dúas proposicións non de lei. A primeira, para que o Ministerio de Fomento, no marco do contrato que Renfe adxudicou a Talgo, dote a Galicia de trens AVRIL de última xeración para a prestación do servizo entre a Comunidade galega (A Coruña, Vigo e Ourense) con Madrid, mellorando tanto os tempos de conexión e facéndoos máis competitivos.
 

 

En segundo lugar, demandarase que o Goberno central exclúa a Galicia do anexo da orde que se atopa en tramitación respecto dos suplementos territoriais para 2013 en relación coas peaxes de acceso á enerxía eléctrica, de xeito que os impostos medioambientais non teñan que ser abonados polos consumidores galegos.
 

 

FACER RUÍDO CO PAZO DE MEIRÁS
 
 

 

Cuestionado sobre a situación do Pazo de Meirás, Pedro Puy afirmou que “estamos de acordo que se recupere para o patrimonio público”, ao tempo que considerou “absolutamente reprobable o comportamento que os herdeiros están tendo nesta cuestión”. “Nestes momentos, os herdeiros do ditador están tendo un comportamento incomprensible, absolutamente irracional e só pensando no seu patrimonio con independencia doutras cuestións, patrimonio que saben que é cuestionable na súa propiedade e están intentando a través de distintos mecanismos facer ruído para que non se materialice o que pedía o informe encargado pola Xunta: actuacións por parte do Estado en sede xudicial aos efectos de recuperar para o patrimonio público do Pazo de Meirás”, lembrou.
 

 


Deste xeito, Puy asegurou que “non temos inconveniente en que o Parlamento se pronuncie no próximo pleno sobre o Pazo de Meirás, porque en Galicia se fixeron os deberes e quen ten que actuar é a Administración do Estado”.

Síguenos nas redes sociais