Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Tellado destaca os datos de paro dun marzo histórico fronte aos nostálxicos da crise

04 Abr 2017

Santiago, 4 de abril 2017.- O secretario xeral do PPdeG, Miguel Tellado, valorou este martes os datos do desemprego relativos ao mes pasado, que achegan unha caída na cifra de desempregados de 21.741 persoas con respecto ao mesmo mes do ano anterior, o que supón un descenso interanual do 9,38%.

Así, subliñou que Galicia “avanza no camiño da recuperación co mellor mes de marzo da serie histórica”, iniciada en 1996, e que “pouco a pouco estamos borrando as pegadas da crise e da súa mala xestión, malia que queda moito por facer”. “Son cifras estimulantes pero, con 210.056 parados, non podemos sentirnos satisfeitos, aínda que si reforzados na nosa convicción de que estamos no bo camiño fronte a aqueles nostálxicos da recesión”, engadiu.

 

Nese senso, Tellado tamén lembra que a Comunidade “xa acadou uns niveis de desemprego inferiores aos de hai oito anos, cando no último ano do bipartito se destruía emprego a ritmo de récord”.

 

Sobre as tendencias que amosan as cifras, puxo enriba da mesa que este é o cuarto mes de marzo consecutivo que cae o desemprego, e que logo de que neste período volvesen a aumentar as afiliacións á Seguridade Social (un 1,98%) se completase o terceiro ano de crecemento desta cifra.

 

O secretario xeral quixo facer un especial fincapé no feito de que caia por riba da media a cifra de desempregados en colectivos que son de especial sensibilidade como os parados de longa duración (10,95%) ou os menores de 30 anos (14,54%), e que están concentrando boa parte dos esforzos nas políticas do Goberno galego neste eido.

 

Con todo, Tellado insistiu en que é necesario “seguir aproveitando a boa onda” e apoiar tanto a creación de emprego como procurar a mellora das condicións dos traballadores para apuntalar a recuperación.

 

Nesta liña, o número dous dos populares galegos puxo en valor o traballo realizado pola Xunta de Galicia nestes últimos anos, salientando iniciativas como a Axenda 20 para impulsar o emprego estable e de calidade. Deste xeito, ademais de lembrar que se reforzaron medidas para os desempregados coa creación de obradoiros, cursos de formación e lanzadeiras de emprego; fixo fincapé na Estratexia para os autónomos á que se dedican 40 millóns de euros e no Plan de Formación e Emprendemento específico para os traballadores do rural, dotado con 30 millóns de euros.

 

CRÍTICAS Á OPOSICIÓN
Para Tellado, as tendencias consolidadas ao longo destes anos son unha mostra de que tanto os gobernos autonómico e central liderados polos populares “acertaron no diagnóstico e nas solucións adoptadas”. Por este motivo critica que “hoxe mesmo os socialistas levan unha moción ao Parlamento na que piden derrogar as reformas que levaron ao país a saír da crise e seguir crecendo na actualidade.

Síguenos nas redes sociais